انا عارف انك مدخلتش كلية الحقوق بس بردوا لازم تعرف انك ممكن تخسر كتير لو معرفتش اهم ١٢ معلومة لازم يكونوا في عقد البيع و انت بتشتري شقتك
في البداية لازم تعرف ان معظم الشقق في المدن الجديدة بتتباع بنظام التقسيط ، عن طريق دفع مقدم ، و دفع أقساط شهرية او دفعات بانظمة سداد مختلفة ،و بعد كده بيتم استلام الشقة في تاريخ محدد
طبعا اي اتفاق شفهي مينفعش تعتمد عليه لان في بعض الاحيان الشخص المسئول عن البيع ممكن يعرض بعض المميزات اللي مش موجودة في ارض الواقع علشان مجرد ان البيع يتم ، لازم تعرف ان ببساطه اي شركة هتلتزم بس باللي موجود في عقد البيع و بالتالي لازم تتاكد ان كل الاتفاقات الشفهية مكتوبة في عقد البيع
مفيش صيغة ثابتة لعقد البيع بالتقسيط ، و الموضوع بيختلف من شركة لاخري ، بس للاسف بعض العقود مش بتدي للعميل حقه ، و العقد الصحيح هو اللي يتم ذكر فيه بوضوح الالتزامات علي المشتري و طبعا الالتزامات المقابلة علي الشركة . و دلوقتي هاوضحلك اهم النقط اللي لازم تكون موجودة في العقد
١- التسلسل الكامل لملكية قطعة الأرض
المقام عليها المشروع
زي مثلا اخطار التخصيص او التوكيلات و محضر الاستلام . و طبعا لازم تتاكد من صحة التوكيلات في الشهر العقاري و طبعا تتاكد من اوراق الملكية في حهاز المدينة.
٢- ذكر موقع الشقة بالتفصيل
زي الدور و رقم العمارة و رقم الشقة و النموذج ، و طبعا ذكر المساحة الاجمالية للشقة .
و لو الشقة في الدور الارضي ملحق بيها حديقة ، لازم نكتب مساحة الحديقة .
٣- ذكر تاريخ الاستلام بوضوح
و طبعا عمل غرامة في حالة التأخير عن تاريخ الاستلام و طبعا تحدد ان الاستلام بيكون من خلال التوقيع على محضر استلام .
و طبعا بنصحك ان تجيب مهندس معاك في وقت الاستلام عشان يتاكد ان مواصفات التشطيب و المساحات مطابقة للعقد .
٤- كتابة الأقساط بوضوح
مع ذكر تواريخ استحقاق كل قسط او دفعة ، و طبعا توضيح فترة السماح .
٥- حصة من ارض المشروع
انك لازم تتاكد ان عقد البيع مذكور فيه بوضوح انك تمتلك حصة علي المشاع من ارض المشروع .
٦- ادخال المرافق
النقطة رقم ٦ هي انك تتاكد ان الشركة ملتزمة بمسئوليتها عن إدخال المرافق إلى المشروع زي المياه ، الكهرباء ، الغاز .
٧- وديعة الصيانة
تحديد وديعة الصيانة و الميعاد اللي هتدفع فيه و مين المسئول عنها.
٨- العنوان
كتابة العنوان المشتري و عنوان الشركة بوضوح تام .
٩- ملحق المواصفات
عمل ملحق مذكور فيه مواصفات التشطيب بالتفصيل زي المحارة و عدد نقط الكهرباء في كل غرفة و الاسانسير و طبعا تشطيبات الواجهة و المداخل و الجراج .
١٠- ملحق رسم هندسي
عمل ملحق به الرسم الهندسي الخاص بالوحدة و طبعا الرسم الهندسي يكون مذكور فيه الابعاد الداخلية لكل غرفة .
١١- تسطير الشيكات
-تسطير الشيكات اللي هتسلمها إلى قسم الحسابات في الشركة ، لان الشيكات لو مش مسطرة ، ممكن عن الطريق الخطا ، يتم سحبهم كلهم مرة من البنك بتاعك ، و طبعا ممكن رفض الشيكات يعملك مشكلة في البنك .
١٢- دعوي صحة توقيع
بعد التوقيع على عقد البيع ، لازم ترفع دعوي صحة توقيع ،و تطلب حضور ممثل الشركة للاقرار بصحة التوقيع علي عقد البيع .
اخيرا ، انا طبعا بنصحك يكون معاك محامي و انت بتوقع عقد البيع و لازم تكون فاهم كل كلمة مكتوبة في العقد .
