طبعا انت دلوقتي قررت تبيع شقتك ، علشان محتاج فلوسها سواء قررت تشتري شقة اكبر او ناوي تحطها في البنك و خلاص ، عملت اعلانات و كلمت اكتر من وسيط و دلوقتي جالك اكتر من مشتري عايز يشتري شقتك
طبعا عملية الشراء سهلة لكن المتعب فعلا عملية البيع ، علشان كدة فيه نصائح كتير و انت بتبيع شقتك بس انهاردة هاركز علي اهم ٥ نصائح و انت بتقابل المشتري
١– انك متظهرش انك عايز تبيع بسرعه و اوعي تبين انك محتاج كاش بسرعة
-بعض الملاك بيكونوا صريحين بصورة مبالغ فيها ، و بيقولوا للمشتري انهم محتاجين كاش بسرعة ، او انهم هيسافروا قريب ، و مضطرين ينهوا البيع بسرعة.
طبعا المعلومات ده هيستغلها المشتري ، و ممكن يعرض عليك عرض أقل بكثير من القيمة العادلة لشقتك.
٢- اعرف السبب الحقيقي اللي من ورا عملية الشراء ، و ايه المميزات اللي المشتري شافها في شقتك ؟ و بعد كدة استغل نفس المميزات انك تزود ارتباط المشتري بشقتك
-في اول المقابلة مع المشتري ، حاول تتعرف اكتر علي المشتري و طبيعة شغله و ساكن فين؟ و اساله سوالين مهمين ٬ السوال الاول : ليه عايز يشتري شقة ؟ ، و السؤال التاني ايه اكتر حاجة عجبته في شقتك .
اجابة السوال الاول ممكن تكون انه عايز يشتري شقتك كاستثمار او سكن .
-لو المشتري قالك انه هايشتريها استثمار ، يبقي لازم تكلمه من وجهة نظر استثمارية بمعني حاول تشرحله معدلات الزيادة في اسعار الشقق السكنية في السنين اللي فاتت و ان متوقع ان الاسعار هتزيد اكتر في الفترة اللي جاية ، يعني لازم تلعب علي عنصر الاستثمار بس في كلامك .
طيب لو المشتري قالك انه ناوي يسكن فيها ، في الحالة ده لازم توجة كلامك ناحية جودة الحياة في المنطقة و لازم توضحله كل اماكن الخدمات اللي جنب الشقة زي مثلا اقرب جامع او اقرب سوبر ماركت بمعني انك تركز علي نقطة الاهتمام بس بتاعه المشتري سواء استثمار او سكن .
السوال التاني كان عن اكتر ميزه عجبت المشتري في شقتك ، و ده من اهم الاسئلة و هاتستخدم فيه نفس الاسلوب بالظبط
علي سبيل المثال ، لو المشتري قالك ان اكتر ميزة لفتت نظره في شقتك هي التقسيم الداخلى للغرف ، يبقي لازم تاكد علي كلامه و تقوله ان ابعاد الغرف في الشقة انت اللي مختارها بنفسك ، و تشرح له انك بالفعل ممكن تكون عملت تعديلات و انت بتشطب شقتك علشان توصل للتقسيمات الموجوده دلوقتي .
٣- متخليش عملية المعاينة سهلة
بمعني لو اتصل بيك المشتري علشان تحدد ميعاد معاينة ، متقولوش (حضرتك حدد الميعاد و انا تحت امرك ) ، ده بيدي انطباع انك هتموت علي البيع .
طيب تعمل ايه ؟
اظهر العكس تماما ، أظهر للمشتري انك مشغول سواء في شغلك او في اي موضوع تاني و انك هتقابله بعد ما تخلص شغلك و طبعا لو فيه مشتري تاني بيعمل معاينة ، يبقي لازم تقوله انك هتقابله بعد ما المشتري الاول يشوف الشقة .
٤- عرف المشتري ان شقتك عليها طلب عالي
وانت مع المشتري ، حاول توضح ان شقتك مرغوبة في السوق العقاري ، و ان سعرها حلو جدا بالمقارنة بمميزاتها ، و انها تعتبر فرصة لأي مشتري ، و لو فيه اكتر من شخص عمل معاينة ، لازم تقوله ان فيه اكتر من شخص ممكن يحجزها في الايام اللي جاية .
٥- ما تنزلش في سعر شقتك بسرعة
انا من وجهة نظري ، ده من اكتر الاخطاء الشائعة اللي بيعملها اي حد بيبيع شقته و هو انه ينزل في قيمة شقته بسرعة علشان هو فاكر ان ده هيخلي المشتري يوقع علي عقد البيع .
علي العكس , المشتري ممكن يخاف من انك خفضت بسرعة في قيمة الشقة و ممكن يحس ان فيه مشكلة في الشقة او الاوراق القانونية او الاسوء من كدة انه يطلب انك تقلل تاني في قيمة شقتك و طبعا انت اللي هتكون اديته الفرصة من البداية .
اي مشتري بيحب يحس انه اخد سعر ممتاز منك علشان يحس انه دفع اقل من قيمة الشقة الحقيقية ، و في نفس الوقت نصيحتي انك متقللش في السعر بسرعة ،،،
طيب ايه الحل ؟
الحل بسيط جدا ، قوله انك مش موافق علي تخفيض السعر لان السعر المعروضة بيه الشقة هو سعرها العادل ، و بالرغم من كدة انت هتديله قرارك النهائي في اخر اليوم ، و في اخر اليوم اتصل بيه و قوله انك وافقت علي تنزل سعر شقتك حاجة بسيطة لو هو ناوي يوقع العقد بكرة .
اخيرا ، شقتك تعتبر استثمارك اللي تعبت فيه سنين طويلة ، حاول تبيعها بسعر تكون راضي عنه ، و في نفس الوقت بنصح اي حد بيشتري شقة انه يديلها حقها علشان ربنا يباركله فيها .
